Werdine Kaligrafi Tulisan Jawa Semar Nomer 1

Manawa dipirsani kanthi permati, kaligrafi semar iki ngemu surasa mangkene:

1.Sugih tanpa bandha

2.Ngluruk tanpa bala
3.Menang tanpa ngasorake
4.Surodira jayaningrat lebur dening pangastuti
5.Sekti tanpa aji
6.Digdaya tanpa japa
7.Sentosa tanpa mantra

Ewadene werdine kurang luwih mangkeke:

1. Sugih Tanpa Bandha

(Bahasa Indonesia : kaya tanpa harta.)

Tegese, kang sinebut sejatining sugih iku ora dumunung ing akehe bandha donya. Naging sugih kang sejati iku manggone ana ing ati kang teteg, tatag, sabar sarta narima ing pandum. Jroning ati mung tansah sumarah mring ngarsane Gusti Kang Akarya Jagad. Ora nggrangsang, ora nggragas, ora sulap marang kahanan donya kang edi peni.

Ora susah ngenteni sugih bandha donya nembe arep aweh marang liyan. Amarga nalika tenaga utawa pikiran kita dibutuhne dening wong liya ing kono batin kita rumangsa sugih. Mulane kita kudu ngaturake panuwun mring Gusti Allah kang wis paring “keluwihan” satemah bisa nandur kabecikan marang liyan.

2. Ngluruk Tanpa Bala

(Bahasa Indonesia : mendatangi musuh tanpa bala tentara)

Tegese, wong urip iku duwea watak satriya. Wani amarga bener, wedi amarga salah, wani tanggung jawab marang sakabehing tumindake. Wani mbelani perkara kang bener sajan mung dhwekan.

3. Menang Tanpa Ngasorake

(Bahasa Indonesia : menang tanpa harus mengalahkan orang lain)

Dadiya wong kang bisa tumindak wicaksana. Nalika ngrampungake perkara bisa tumindak adil ora emban cinde emban siladan, satemah para-para kang duwe perkara bisa rumangsa marem ora runtik penggalihe. Semono uga menawa kita dhewe ana pihak kang bener, aja nganti duwe patrap kumalungkung lan sombong, nanging kudu bisa ngemong siji lan sijine wekasane bisa dadi becik sakabehe.

4. Suradira Jayaningrat Lebur Dening Pangastuti

Ukara ing dhuwur sawijing ukara “ungkapan” basa jawa kang lumrah dipirsani dening sapa wae. Ukara iku ngemu surasa menawa sakabehing tumindak ala, angkara murka, nerak paugeran agama, paugeran pamarintah, paugeran bebrayan agung mesti bakal dikalahake utawa dilebur dening pamuji, pangalem, pangabekti, panembah, sabar lan sumarang mring Gusiti Kang Murbeng Dumadi.

5. Sekti Tanpa Aji, Digdaya Tanpa Japa, Sentosa Tanpa Mantra.

Telu-teluning ukara ing dhuwur duwe teges kang padha. Sekti duwe teges digdaya uga sentsa, dene aji duwe teges kang meh padha karo japa mantra. Mung bedane menawa aji utawa uga diarani aji-aji bisa arupa barang utawa senjata, dene japa mantra arupa donga utawa rapal kang diucapke nalika arep digunakne.

Dene werdine kurang luwih mangkene, sekti, digdaya uga sentosa kang sejati yaiku nalika kita ora duwe musuh, ora tau nglarani penggalihe liyan, tansah tepa slira, andhap asor. Amarga senjata, aji lan japa mantra kang sejati yaiku “tresna sejati” lan “sejatine tresna” satemah ora ana alesan kang arupa apa wae wong liya bakal ora seneng marang kita. Sifate tresna kang sejati iku mutlak ora pilih-pilih. Kabeh titahe Gusti Allah duwe hak entuk katresnan kang sejati mau. Tresna sejati bisa ndadekake kita wong kang mardika kang bisa tentrem (uripe aman, kepenak lair batin), ayem (ora kagodha mobah musiking kahanan) lan lerem (ngeningake pikiran)